Þetta er Lífeyrissjóður verzlunarmanna

Eftir áratug af lágvaxtaumhverfi og lítilli verðbólgu varð viðsnúningur árið 2021 í kjölfar árásar Rússa á Úkraínu. Áframhaldandi átök í heiminum hafa leitt af sér umrót á alþjóðlegum hrávöru­ og orkumörkuðum með tilheyrandi verð­ og vaxtahækkunum og óvissa ríkir.

Fjárfestingarumhverfi sjóðsins var hagfellt á árinu 2024 eins og sést af góðri ávöxtun eignasafna. Innanlands tók verðbólga að hjaðna og samhliða því hófst vaxtalækkunarferli Seðlabanka Íslands með tveimur vaxtalækkunarákvörðunum undir lok árs.

Innlend skuldabréf skiluðu góðri ávöxtun. Þá tóku innlend hlutabréf við sér seinni hluta árs og skiluðu umtalsvert betri afkomu en árið á undan.

Erlendis var sömu sögu að segja. Hagvöxtur í Bandaríkjunum reyndist kröftugri en búist var við og seðlabankinn þar í landi lækkaði vexti á árinu. Vaxtalækkun átti sér einnig stað á evrusvæðinu. Erlend skuldabréf sveifluðust töluvert í verði á árinu vegna framvindu efnahagsmála og enduðu árið nálægt 0% ávöxtun.

Aðra sögu er að segja um erlend hlutabréf sem áttu, líkt og á árinu 2023, feikigott ár sé horft til heimsvísitölu hlutabréfa en ávöxtun í Bandaríkjunum var einkum drifin áfram af tæknifyrirtækjum líkt og árið áður.

Nýtt grunnkerfi fyrir skráningu iðgjalda og nýr fyrirtækjavefur voru tekin í gagnið í september. Breytingin er fyrsta skrefið í endurnýjun tæknilegs umhverfis iðgjalda og skilagreina hjá sjóðnum.

Í febrúar hófum við að bjóða sjóðfélögum að bóka tíma með ráðgjafa á live.is. Að jafnaði eru um 100 bókaðir tímar á mánuði. Tveir þriðju velja ráðgjöf vegna lífeyrismála en um þriðjungur bókar vegna lánamála.

Á haustmánuðum fóru fyrstu bréfin til sjóðfélaga í pósthólf þeirra á island.is. Innan skamms verða öll bréf send í pósthólfið sem eykur bæði öryggi og hagkvæmni.

Í desember voru kynnt yfirlit til sjóðfélaga sem eru alltaf uppfærð og lifandi á Mínum síðum.

Hámarkslán voru hækkuð í 90 milljónir króna til að mæta hækkun á fasteignamarkaði undanfarin ár.

Fyrstu kaupendur eiga nú kost á 85% lánshlutfalli og þurfa aðeins að hafa greitt einu sinni til sjóðsins til að fá lánsrétt.

Hæstiréttur staðfesti í nóvember 2024 lögmæti breytinga á samþykktum sjóðsins sem tóku gildi í ársbyrjun 2023. Með þeim var brugðist við hækkandi lífaldri sjóðfélaga. Dómstóllinn tók undir þau sjónarmið sjóðsins að þar sem áhrif breytinga á lífslíkum væru mismunandi eftir árgöngum væri sjóðnum heimilt að breyta mánaðarlegri fjárhæð áunninna réttinda mismikið eftir aldri. Það er að lækka þau meira hjá þeim yngri en þeim sem eldri eru enda lengist vænt ævi þeirra yngri meira og allir árgangar halda óbreyttum áætluðum verðmætum heildarréttinda sinna fyrir og eftir breytingarnar.

Sjá nánar í kafla II um lífeyrisafurðir og í skýrslu stjórnar.

Alþingi samþykkti á árinu lög um breytingar á lögum nr. 129/1997 um lífeyrissjóði sem auka svigrúm lífeyrissjóða til fjárfestinga í hlutafé og skuldabréfum fyrirtækja sem hafa það að meginstarfsemi að leigja íbúðarhúsnæði til einstaklinga í langtímaleigu.

Á árinu fjárfesti LV í um fimmtungshlut í Íveru íbúðafélagi sem býður einstaklingum upp á langtímaleigu.

Á árinu innleiddi Seðlabanki Íslands með reglum nr. 1023/2024 reglur framkvæmdastjórnar ESB nr. 2022/1288 varðandi upplýsingaskyldu samkvæmt reglugerð (EU) 2019/2088 (PAI-reglugerð) um sjálfbærniupplýsingar fyrirtækja (SFDR – Sustainable Finance Disclosure Regulation).

LV stefnir að því að stíga fyrsta skrefið á árinu 2025 og birta hluta upplýsinga samkvæmt PAI- reglugerðinni í júní 2025 fyrir árið 2025 og ná því marki að birta upplýsingar að fullu árið 2027 vegna ársins 2026.