Lífeyrissjóður verzlunarmanna (LV) var stofnaður þann 1. febrúar 1956 sem gerir hann að einum elsta starfandi lífeyrissjóði landsins. Kjarnastarfsemi sjóðsins lýtur að móttöku iðgjalda, ávöxtun eigna í eignasöfnum sjóðsins og útgreiðslu lífeyris. LV er samtryggingarsjóður og er hlutverk hans að tryggja sjóðfélögum víðtæk lífeyrisréttindi og verðmæta tryggingavernd við áföll.

Öllum launþegum, og þeim sem stunda atvinnurekstur, er skylt samkvæmt lögum að greiða iðgjald til lífeyrissjóðs frá og með 16 ára til 70 ára aldurs. Launþegar, sem eru félagar í VR, eiga aðild að sjóðnum. Aðild eiga jafnframt félagar í öðrum samtökum verslunarmanna og þeir sem njóta starfskjara samkvæmt kjarasamningi VR eða starfa á starfssviði sjóðsins. Enn fremur er þeim launþegum rétt og skylt að eiga aðild að sjóðnum sem njóta ekki starfskjara samkvæmt kjarasamningi VR og eiga ekki skylduaðild að öðrum lífeyrissjóði. Sjálfstæðum atvinnurekendum og sjálfstætt starfandi einstaklingum er heimilað aðild að sjóðnum.

Sjóðurinn er langtímafjárfestir sem ávaxtar fjármuni sjóðfélaga með það að markmiði að ná sem bestri ávöxtun að teknu tilliti til áhættu með sjálfbærni að leiðarljósi.

Í árs- og sjálfbærniskýrslu sjóðsins fyrir árið 2021 er gerð grein fyrir starfsemi sjóðsins.

Hjá sjóðnum er 51 starfsmaður og er starfsemi hans skipt í sjö meginsvið; eignastýringu, lífeyri, áhættustýringu, lögfræði, fjármál, rekstur og upplýsingatækni. Framkvæmdastjóri og forstöðumenn sviða skipa framkvæmdastjórn sjóðsins.

Lögfræðisvið, forstöðumaður er Tómas Njáll Möller

Hann hóf störf sem lögfræðingur sjóðsins 2008.

Lögfræðisvið veitir stjórn, framkvæmdastjóra og sviðum sjóðsins lögfræðiráðgjöf og tekur þátt í úrlausn margþættra viðfangsefna og hagsmunagæslu fyrir sjóðsins. Sviðið veitir einnig ráðgjöf varðandi stjórnarhætti og annast samþættingu sjálfbærni í starfseminni. Á sviðinu starfa tveir lögfræðingar.

Eignastýringarsvið, forstöðumaður er Arne Vagn Olsen

Hann gekk til liðs við sjóðinn árið 2018.

Eignastýring stýrir eignasöfnun sjóðsins, mótar og innleiðir fjárfestingastefnu hans. Starfsmenn eru fimm.

Lífeyrissvið, forstöðumaður er Margrét Kristinsdóttir

Hún hóf störf hjá sjóðnum árið 1995.

Lífeyrissvið annast lífeyrisráðgjöf, mótar og innleiðir þróun lífeyrisafurða og úrskurð lífeyris. Séreignardeildir sjóðsins eru hluti af lífeyrissviði. Auk trúnaðarlæknis eru sex starfsmenn á lífeyrissviði.

Áhættustýring, forstöðumaður er Magnús Helgason

Hann gekk til liðs við sjóðinn árið 2015.

Áhættustýring mótar og innleiðir áhættu- og áhættustýringarstefnu sjóðsins, framkvæmir áhættumat og greiningar og kemur að mótun og framkvæmd eftirlitskerfis sjóðsins. Í áhættustýringu starfa 2 starfsmenn.

Fjármálasvið, forstöðumaður Valgarður I. Sverrisson

Hann hóf störf hjá sjóðnum árið 1986.

Fjármálasvið ber m.a. ábyrgð á fjárhagsbókhaldi, miðvinnslu og greiðslu reikninga og kemur að gerð ársreiknings. Á fjármálasviði eru 5 starfsmenn.

Upplýsingatæknisvið, forstöðumaður er Haraldur Arason

Hann hóf störf hjá sjóðnum árið 1986

Upplýsingatæknisvið þróar upplýsingakerfi sjóðsins, hefur umsjón með útvistun, notendaþjónustu og rekstri vélbúnaðar. Á sviðinu starfa 7 starfsmenn.

Rekstrarsvið, forstöðumaður er Hildur Hörn Daðadóttir

Hún hóf störf hjá sjóðnum árið 2021

Rekstrarsvið annast innri þjónustu og ytri þjónustu til sjóðfélaga. Á sviðinu starfa 23 starfsmenn í fimm deildum: gæðastjórn, mannauður, þjónustuver, skráning iðgjalda og lánadeild.